හතළිස් එක්වෙනි කොටස : පුස්තකාලයේ දවසක් - 1

බස්සා බොහෝම අකැමැත්තෙන් තමයි පුස්තකාලෙට යන්න එකඟ වෙන්නෙ. ඒත් විභාගෙට දවස් දෙක තුනකට කලින් විභාග භීතිකාව වැලඳුන බස්සිගෙන් එයාට බේරෙන්න ලැබෙන්නෙ නෑ.

අන්තිමේදි පොත් දුසිමක් විතර කරපින්නා ගත්තු බස්සියි, පිටු හතර පහක ටියුට් එකක් රෝල් කර ගත්තු බස්සයි පුස්තකාලෙට ඇතුලු වෙනවා.

උදේ හතහමාර වෙනකොට පුස්තකාලෙ පෝලිමට එකතු වුනේ නැත්නම් බස්සිගේ ප්‍රියතම ආසනය අහිමි වෙන්න තියෙන ඉඩකඩ වැඩියි. ඒ ආසනය නැති වුන දාට බස්සිගෙ පාඩම් කිරීමට බාධා බොහොමයි.

බස්සා ඔලුව කසකසා ඇවිත් බස්සිගෙ එහාපැත්තෙන් වාඩි වෙනවා. බස්සාව එතන වාඩිකරවලා බස්සි යනවා රෙෆරන්ස් පොත් හොයන්න. බස්සි ආපහු එනකොට බස්සා බස්සිගෙ පෑන් දෙකක් අරගෙන ඩ්‍රම් වාදනයක් ආරම්භ කරලා.

බස්සි බරට බරේ තඩි පොත් දෙකක් උස්සගෙන ඇවිත් සටහන් ටික දිගඇරගන්නවා. බස්සත් හෙමින් සීරුවේ වාදනය නවත්තලා බස්සිගේ පොත් ගොඩෙන් හිස් කඩදාසි දෙකතුනක් ඇදලා අරගෙන ටියුට් එකට එබෙනවා.

පැයක් විතර ගතවෙනකොට බස්සාගෙ යාලු කුරුල්ලො එකා දෙන්නා පුස්තකාලෙ ඇතුලෙ තටු ගහනවා පේනවා. එයාලා කැරකිලා ඇවිත් බස්සාගෙ මේසෙ කෙලවරේ වහනවා. අඩුම තරමේ පැය කාලක්වත් වල්පල් කියවනවා. ටික වෙලාවකින් බස්සත් යාලු කුරුල්ලො ඉන්න තැන් වල කැරකෙන්න පටන් ගන්නවා.

"කම්මැලී නේ..." බස්සා බස්සිගෙ පිටිපස්සෙන් ඇවිත් අහනවා.

"ඉඳගෙන වැඩක් කරනවා පිස්සෝ..!"

"තේ බොන්න යමු?" බස්සා බස්සිගෙ අතින් අදිනවා. "යමුකො බස්සියෝ.... එනවකො වදේ..!"

බස්සිටත් ඊට එහා කියන්න දෙයක් නෑ. දෙන්නත් එක්ක යනවා කැන්ටිමට.

කැන්ටිමේදි යාලු කුරුල්ලොත් එක්ක කියවකියවා පැයක් විතර ගත කරනවා. ඉන් පස්සෙ ගිරා ගහ යට හරි අයි.ටී. ගහ යට හරි වාඩි වෙලා දෙන්නත් එක්ක කිචිබිචි ගගා ඉන්නවා. ටික වෙලාවකින් බස්සා ඈනුම් අරිනවා. බස්සිටත් ඉක්මනටම ඈනුම බෝ වෙනවා.

"බඩගිනියි නේ?" බස්සා අහනවා.

"හ්ම්ම්.... දැන් ඉතින් දවල්ට කාලම යමු."

හතළිස්වෙනි කොටස : අධ්‍යයන නිවාඩුව

හැම සමාසිකයකම අවසානයේ, විභාගයට සති දෙක තුනකට කලින් කුරුලු ඉස්කෝලෙට අධ්‍යයන නිවාඩු ලැබෙනවා. බස්සයි බස්සියි ඔය අධ්‍යයන නිවාඩුවලින් සැලෙනවද? නෑ!  සුපුරුදු විදියට කැන්ටිමට වෙලා කාටුන් බල බලා, ගිරා ගහ හෙවණට වෙලා කිචිබිචි කියකියා දවස ගෙවනවා. බස්සගෙ ලැප් මල තුරුලට අරන් ෆිල්ම් බැලීමත් අමතක කරන්නෙ නෑ.

ඔහොම දවස් හත අටක් යනකොට විභාග කාලසටහන් දැන්වීම් පුවරු වල ඇලවෙනවා. එදාට නම් බස්සි තරමක් නොසන්සුන් වෙනවා. විභාගයෙදි සම්පූර්ණ කරන්න වෙන ක්‍රෙඩිට් ගානයි, පාඩම් කරන්න තියෙන දවස් ගානයි ගණන් කරනවා. ක්ලාස් එකක් ගන්න තියෙන්න ඕනෙ අවම සාමර්ථය අනුමාන කරනවා.

බස්සා තවමත් කූල් එකේ ෆිල්ම් එකක් බලාගෙන, වෙබ් සයිට් එකක් හදාගෙන පාඩුවෙ ඉන්නවා.

ප්‍රායෝගික පරීක්ෂණ පැවැත්වෙනවා. බස්සා ලෙක්චර් එකකට යනවාටත් වඩා සැහැල්ලුවෙන් ඒවට යන්නෙ. ඇත්ත නේන්නම්, දවස තිස්සෙම ඉලෙක්ට්‍රොනික් ගැජට් අමුණ අමුණ, එහෙමත් නැත්නම් ලැප් මල තුරුලු කරගෙන කාලෙ ගෙවන බස්සා ප්‍රැක්ටිකල් වලට බය නැති එක සාදාරණයි.

හැබැයි ෆිසික්ස් ප්‍රැක්ටිකල් තිවුනොත් බස්සගෙ මූඩ් එක තරමක් සීරියස්. ඒත් කවදාවත් මෙයා ප්‍රතිපත්ති කඩන්නෙ නෑ නෙව. ප්‍රැක්ටිකල් වලට පාඩම් නොකිරීම බස්සාගෙ ප්‍රතිපත්තියක් ලු.

බස්සිගෙ තත්වය නම් මීට වඩා වෙනස්.

කෙමෙස්ට්‍රි සහ මොලෙකියුලර් බයෝලොජි ප්‍රැක්ටිකල් එක්සෑම් එනකම් බස්සිත් ආසාවෙන් මග බලාන ඉන්නවා. ඒ දෙකට නම් ගෙදර යනව වගේ සැහැල්ලුවෙන් ගිහින් එන්න තරමට හිතේ විශ්වාසයක් තියෙනවා.

ඒත් බස්සිගේ බලවත් විරෝධය මත බස්සිගේ කරපිට බලෙන් පටවපු සත්ව විද්‍යාව මතක් වෙද්දි නම් බස්සිට අජීරණේ හැදෙන්න එනවා. කුරුමිණියො වර්ග තුන්සියයක, මාලු වර්ග දෙසියයක නිදර්ශක නම් කරන්න විද්‍යාත්මක නම් කටපාඩම් කරන එකට කැමති කෙනෙක් ඉන්නවානම් පොඩ්ඩක් අත උස්සන්න. බස්සි ආසයි එයාව දැකබලාගන්න.

ඒ නිසා සත්ව විද්‍යා පරීක්ෂණයට ලැබ් එකට යන්න පැය දෙක තුනකට කලින් ඉඳන් බස්සිගෙ කකුල් දෙක ගිටාර් ගහන්න පටන් ගන්නවා.

බස්සා බස්සිගේ හිත හදලා, ලැබ් එක ළඟටම එක්කගෙන යනවා. එක්සෑම් ඉවර වෙනකම් බස්සා එලියෙ බැම්මක් උඩට වෙලා බලාගෙන ඉන්නවා.

සත්ව විද්‍යාව නිසා බස්සිගේ හිතටත් විභාග භීතිකාව කාන්දු වෙනවා. අන්තිමේදි වදෙන් පොරෙන් බස්සාවත් ඇදගෙන, පොත් කන්දකුත් කරේ තියාගෙන බස්සි පුස්තකාලයට ඇතුලු වෙනවා.

ජාලයේ සරන අසහනකාරයෝ

බස්සි ෆේස්බුකියේ සිරි ලංකාවේ ෆැශන් පිටු ගැන හොයන්නට හැදුවේ පොඩි පහේ මාර්කටිං වැඩකටය. නමුත් සර්ච් බාර් එකේ Sri Lankan කියා ටයිප් කොරන විට පැමිනි suggestions දැක බස්සිගේ ඇස් උඩ ගියේය.

මාර්කටිං වැඩේ පැත්තක දමා ඒ පිටු එකින් එකට ඉගිල්ලී බැලුවේ හිතේ ඇතිවූ කුතුහලය නිසාමය.

බොහොමයක් පිටුවල ඇති පින්තූර වල ඉන්නේ වෙන කවුරුවත් නොව අපි වාගේම අක්කලා, නංගිලාය. පාටියකට ගිහින් ඩාන්ස් කරන, මුහුදු වෙරලේ සෙල්ලම් කරන, නාන තටාකයක විනෝද වෙන කෙල්ලන්ය.

ඒ අතරේ තරමක් සභ්‍යත්වයෙන් ඔබ්බට ගිය ඡායාරූපද ඇත. එවැනි ඡායාරූප බොහොමයකට පහලින් පින්තූරය සැපයූ කොල්ලාගේ නමත් ටැග් කරලා තියෙනවාය. ෂුවර් එකටම බූට් කේස් එකකට පළිගන්නට හදන එවුන් වෙන්නට ඇතිය.

පාසල් යන වයසේ කෙල්ලන්ට වෙනමම පේජ් එකකි. ජාත්‍යන්තර පාසල්වල කෙල්ලන්ට වෙන්වුන තවත් පිටුවකි.

පාසල් ඇඳුමින් සැරසී ඉන්නා අහිංසක කෙල්ලෙක්ගේ පින්තූරයක් යටින් කොටා ඇති කොමෙන්ටු වැල නම් දකින විට හිරිකිතය. හොඳ වෙලාවට ගොඩක් එවුන් කොමෙන්ටු කොටා ඇත්තේ අමු සිංහලෙන්ය. නැත්නම් ලංකාවේ අපිට ලැජ්ජාව වහගන්නට වෙන්නේ අඟහරු ලෝකයට ගිහින්ය.

රොෂාන් පෙරේරාගේ 'පෙරදා හඬවා ගියා ඔයා' ගීතයේ මියුසික් වීඩියෝවේ අතිශය සභ්‍ය ලෙස පාසල් සිසුවියකගේ චරිතය රඟපාන කෙල්ලගේ පින්තූරයත්, ඒ යටින් මේ අසහන කාරයෝ පහරා ඇති ආකාරයත් දකින විට ඉතා පිළිකුල් සහගතය. ලංකාවේ වුනාට මියුසික් වීඩියෝවනම් දැක නැති බව පෙනී යන්නේ "මේ ****ගෙ නම්බර් එක දීපන්කො." සහ "පැයකට අයකිරීම" අසා කොමෙන්ටු දමා ඇති නිසාය.

බස් රථයක, දුම් රියක ඇතුලේ කැමරා ෆෝන් වලින් ගත් බව පෙනෙන ඇන්ටිලාගේ ඡායාරූපද එමටය.

ජාලය තුල අපහාසයට ලක්කිරීම සැබෑ ජීවිතයේදී තමන්ට අභිබවා යන්නට නොහැකි ගැහැණුන්ගෙන් පළිගැනීමට ඇති හොඳම ආයුධය බැව් සමහරු හිතන්නේය.

බස්සිගේ අම්මාගේ මිතුරියක් වන ඇය කීර්තිමත් විද්‍යාඥවරියක්ය. ආචාර්ය උපාධිය ලබා ලංකාවට පැමිණ වසර දෙකක් ගතවන විට ඇය නව නිපැයුම් විස්සකට ආසන්න සංඛ්‍යාවක් බිහි කල අතර ඒ නිසාම ආයතනය තුළ පැසසුමටද පත් වූවේය.

එක් වරම ඇයට අමුතුම ආකාරයේ දුරකථන ඇමතුම් ගලා එන්නට පටන් ගත්තේය. ඒ එක එකා සමඟ අනියම් සබඳතාවන්ට ආරාධනා කරමින්ය. මෙහි අගක් මුලක් වටහා ගත නොහැකි වූ ඇය පොලීසියේ සහය පැතුවාය.

ගේම දී තිවුනේ ඒකම ආයතනයේ සේවය කරන තවත් විද්‍යාඥයෙක්ය. ගැහැණියක් තමා ඉක්මවා කීර්තියට බඳුන් වෙනු නොරිස්සූ ඔහු ඇයගේ තොරතුරු අසැබි වෙබ් අඩවියකට ඇතුල් කර තිවුනේය.

ඉමහත් කළකිරීමට පත් ඇය මාස දෙකකට ඉහතදී රට හැර ගියාය. ලංකාවට ඒ සමග අහිමිවූ දෑ බොහෝය. අනාගතයේදී ඇගේ නිපැයුම් වෙනත් රටකින් කළඑලි බසිනු ඇත.

ෆේස්බුකියේ ශ්‍රී ලංකාව ගැන තොරතුරු ගවේශණයට සැරසෙන විදේශිකයෙකුටත් පළමුවෙන්ම දක්නට ලැබෙන්නේ බස්සි දුටු පිටු පෙළගැස්මය. දකින එකා හිතන්නේ ශ්‍රී ලංකාව ගණිකාවන්ගේ පාරාදීසයක් බවය. හිතේ කුතුහලයට බස්සි සිංගප්පූරුව සහ තායිලන්තය ගැනත් ෆේස්බුකියේ හෙවුවාය. අනේ ඒ රටවල් වල ආපනශාලා, සංචාරක තොරතුරු, අධ්‍යාපනය ගැන නිමැවුනු වෙබ් පිටුවල අපූරු පෙළගැස්මක් ලැබෙනවාය. අපේ අයියලාගේ සුවිශේෂ හැකියාවන් සමග සුද්දන්ට හැරෙන්නටවත් බැරිය.

මෙවුවා මෙහෙම වුනා කියලා ලංකාවේ ගෑණු ළමයින් ලෝකයෙන් වහං වී සිටිය යුතු නැති බව බස්සිගේ අදහසය. ප්‍රොෆයිල් පික්චර් එකට කාටූන් පිංතූරයක් දමා හැබෑ මූණ සඟවා ගන්නට එපාය. එක එකාගේ අසහනයන්ට බයේ හැංගි හැංගී ජීවත් වුනොත් අපිට ජීවිතය විඳින්නට ඉඩක් නැති වෙනවාය.

එහෙම කියූ පලියට යට ඇඳුමින් ඉඳගෙන බාත් රූම් එකේ ඉඳන් ෆොටෝ අරන් ඉන්ටනෙට් දාන්නට තරම් අපේ කෙල්ලන් මෝඩ වුනොත්නම් සොරි තමාය. අර බ්‍රිජට් කන්‍යාරාමයේ කෙල්ලන් ටික පාසල් ඇඳුමේ ගෞරවය තුට්ටුවට දමමින් අරන් තිවුන ෆොටෝ වාගේ එවුවා නම් ජාලයට එකතු වූ විගස නිසි ප්‍රතිකර්ම ලැබෙන්නේය. ඒවාට කාටවත් කරන්නට දෙයක් නැත. දිට්ඨ දම්මවේදනීය කර්ම කියන්නේ එහෙම එවුවාටය.

බස්සි නම් පාරේ තොටේදි සමාජයට පෙන්නන මේ මූණත් තහඩුව ඒ විදියටම ජාලයටද එකතු කර ඇත්තේ හඳුනාගැනීම පහසු වෙන්නය. ඇත්තෙන්ම ජාලයට එහෙම ෆොටෝ එකක් එකතු කිරීමෙන් පැරණි මිතුරන් හඳුනා ගැනීමට ලැබෙන අවස්ථාවත් වැඩිය. විශ්වාසයත් වැඩිය.

අන්තිමටම කියන්නට තියෙන්නේ වරදක් නැතුව කතා අහන්නට වුනා කියා කෙල්ලනේ වහ බොන්නට නම් එපාය. ජාලයේ අසහනකාරයන්ට දෙන්න තියෙන හොඳම උත්තරය මේකය;

පින්තූරයේ මුල් අයිතිය PAPADAMNගේය. බස්සිටනම් පොර ෆෙස්බුකියේ ඉන්නා සැබෑ සුපිරි වීරයෙක්ය.

බල්ලෝ ඊයෙත් හඳට බිරුවෝය. අදත් බුරති. හෙටත් බුරනු ඇත. ඒක නවත්තන්නට කාටවත් බැරිය. ඒත් ගෙදර බල්ලා ලෝකෙට පෙනෙන්නට පහරනවානම් ඌව බැඳ තබා මට්ටු කරන එක නුවණට හුරුය.

තිස්නමවෙනි කොටස : ගිරා ගහ

බස්සි බස්සත් එක්ක කාලය ගතකරන්න කැමතිම තැන් කිහිපයෙන් එකක් තමයි 'ගිරා ගහ'. මේකට  බස්සිගේ යාලු කුරුල්ලො නම් කියන්නෙ 'පච ගහ' කියලයි. මොකද මේ ගහ යට තමයි එක වසරෙ කුරුලු බබාලට දෙක වසරෙ අයියල බැච් මීටින් තියන්නෙ. (දෙක වසරෙ අක්කලාව මේ වැඩ වලට සම්බන්ධ කරගන්නෙ නෑ. පුරුෂාධිපත්‍ය කැම්පස් ස්ටුඩන්ට් යූනියන් වල ඔඩු දුවල තියන නරකම ලක්ෂණයක්!)

ගිරා ගහ කියන්නෙ කාලාන්තරයක් පරණ, විසාල නෙල්ලි ගහක්. ගහ යට තණනිල්ලෙ  උද්‍යාන බංකු කීපයක් තියෙනවා. හවසට ඉර බැහැගෙන යන වෙලාවට එතන තියෙන්නෙ පුදුම සිසිලසක්. කාටූන් බලන්න කම්මැලි හිතෙන දවසට බස්සගෙයි බස්සිගෙයි නවාතැන්පොළ මේ ගිරා ගස් හෙවණ තමයි.

'ගිරා ගහ' කියන නමත් බස්සිගේ නිර්මාණයක්. ගහේ ගිරවු පදිංචි වෙලා ඉන්න බෙන පහක් තියෙනවා. ගිරා පවුල් පහයි.

කාලෙකට ගිරා ජෝඩු ගහේ අතුවල වහලා තුරුළු වෙලා ඉන්නවා. හිටපු ගමන් ගිරවි ගිරවට කොටල අහකට තල්ලු කරලා දානවා. ආපහු ටික වෙලාවකින් ගිරවා හෙමින් හෙමින් ළං වෙනවා. ගිරවිගෙ අත්තටු පිරිමදින ගමන් රහසක් කියනවා.

තව ටික කාලෙකින් දෙන්නා හරිම කාර්යබහුල වෙනවා. ගිරවා පුංචි පුංචි පිදුරු ගස්, පුළුන් කෑලි ගෙනත් ගිරවිට දෙනවා. ගිරවි ඒවා බෙනේ ඇතුලෙ ලස්සනට අහුරනවා.

ඉන් පස්සෙ ගිරා අම්මා බෙනේ ඇතුලෙන් එලියටවත් බහින්නෙ නැති කාලයක් එළඹෙනවා. ගිරා තාත්තා කෑම හොයාගෙන ඇවිත් එයාට කවනවා.

ටික කාලෙකින් පුංචි පැටවුන්ගෙ හුරතල් හඬ ඇහෙන්න පටන් ගන්නවා. අම්මයි තාත්තයි දෙන්නා හරිහරියට කෑම හොයන් ඇවිත් පැටවුන්ට කවනවා. පුංචි හොටවල් ඇතුලට බලෙන්ම ලොකු ලොකු කෑම කෑලි තල්ලු කරනවා.

වෙලාවකට දෙන්නා දෙමහල්ලො කිචිබිචි ගගා බැන ගන්නවා. කිරිල්ලි බෙනේ සිදුරෙන් එලියට ඔලුව දමාගෙන කෑ ගානව. ගිරා තාත්තා ඔලුව දෙපැත්තට පද්ද පද්දා අහගෙන ඉන්නව. කිරිල්ලිගෙ සද්දෙ නැවැතුන හැටියෙ බෙනේ දිහාවට එබිලා බලනවා "කචකචේ ඉවරෙයි නෝනේ?" කියලා අහනවා වාගෙ.

බස්සි ගිරාගහ යට බංකුවෙ වාඩි වෙලා බස්සගෙ උරහිසට හේත්තු වෙලා ගිරා කැදැල්ලෙ අසිරිය විඳිනව. බස්සා "හ්ම්ම්..." කියන්නෙවත් නැතුව බස්සි කියවන ගිරා කැදැල්ලෙ විස්තරේ අහගෙන ඉන්නව.

කැම්පස් එකේ ටීචර්ල වැඩ වර්ජනය කරල නිසා බස්සිලාට මාස තුනක විතර දිග නිවාඩු කාලයක් ලැබෙනව. නිවාඩුව ඉවරවෙලා කැම්පස් එන මුල්ම දවසෙ බස්සි බස්සත් එක්ක ගිරා ගහ බලන්න යනවා.

ගිරා පවුල් පහකට හෙවණ දුන්න ගිරා ගහේ කඳ කුට්ටි කපල උද්‍යාන බංකු පේලියට එහායින් ගොඩගහල තියනව.

ගහේ බෙන වල ගිරා අම්මයි තාත්තයි හදාපු තොටිලි වල නිදාගෙන උන්නු ගිරා පැටවු මතක් වෙලා බස්සිගෙ ඇස් දෙක තෙත් වෙනවා. ගිරා පැටවු ගැන මතකය ඇස් දෙකෙන් එලියට පැනල, කම්මුල් දිගේ පහලට ගලාගෙන යනවා. බස්සා බස්සිගෙ ඇස් දෙක උරහිසට තද කරගෙන ඔලුව අතගානවා.

බ්ලොග් පිටුවෙ අකුරු කොටන බස්සිගෙ කී බෝඩ් එකට ගිරා ගහේ මතකය කඳුලු බිංදුවක් වෙලා වැටෙනව.

තිස් අටවෙනි කොටස : පොඩ්ඩාගේ ස්තූති කථාව

"මොනවද බස්සියෝ අපි හොස්ටල් එකේ යාලු කුරුල්ලන්ට දෙන්නෙ?" උපන්දිනේ දවසෙ හවස් වෙනකොට බස්සා බස්සිගෙන් ඇහුවා. උපන්දින කියන ඒව තමන්ට අමතක වුනත් යාලුවන්ට අමතක වෙන්නෙ නෑ නෙව.

බස්සා මල්පැණි බොන්නෙ නැති නිසා යාලුවන්ට 'සාමාන්‍ය' පාටියක් දෙන්න විදියක් නෑ. කේක් තමයි පහසුම විසඳුම.

"වාසනා බේකර්ස් එකෙන් කේක් ගේමු." බස්සි යෝජනාව ගෙනාවා. 'වාසනා කේක්' ගැන අහලා නැති කුරුල්ලෙක් ඉන්නවනම් බස්සිගෙන් අහලා දැනගෙන ගිහින් කාලා බැලුවත් පාඩු නෑ ඕං. ඒ තරම් අපූරුයි රස.

හවස් වෙලා බස්සයි බස්සියි දෙවනි වතාවටත් කිරිබත්ගොඩ ගියේ පාටියට උවමනා කේක් ගේන්න. පුරුදු විදියටම බස්සිව බෝඩිමට ඇරළලා බස්සා හොස්ටල් යන්න බස් එකට නැග්ගා.

බස්සා බෝඩිමට ගිහින් පැය දෙක තුනක්ම ගතවුනත් සද්දයක්වත් නෑ. ජාලයේ චැට් කවුලුව ඇතුලෙත් නෑ. බස්සි කෝල් එකක් ගත්තෙ එහෙම වෙලාවට හිතට බයක් දැනෙන නිසයි.

"හෙලෝ බස්සියෝ..." බස්සගෙ කටහඬ යාන්තමින් ඇහුනා. අපෙ අප්පෝ එතන නිකම් කැම්පස් හොස්ටල් එකක් නෙමෙයි මොන්ටිසෝරියක් වගෙයි සද්දෙ.

"මේ කට්ටිය පාටි ඉල්ලන්න ඇවිල්ලා. මම පස්සෙ ගන්නම් හොඳේ. බයි බායි" බස්සා ෆෝන් එක තිවුවා. කළබලේට බස්සා කෝල් එක කට් කලේ නැහැ.

බස්සි ඉතින් හොඳ කුරුලු පොඩිත්ති නිසා කට් කරන්නෙ නැතුව බස්සගෙ හොස්ටල් එකට කන දාගෙන හිටියා.

"මල්පැණි පාටියට රෑ වෙලා අපි ආපහු එනව එහෙනම්."

"කෝ කේක්... කෝ කෝ කෝ කේක්....."

"අඩෝ ඒව කැතයි ඕන් ලොකු කෑලි සේරම මූට"

"හා හා කටවහපල්ලා. ස්තූති කතාව කරන්න."

සභාවෙන් අවසරයි,

මහත්වරුනි, විශේෂයෙන්ම නෝනාවරු නැති මහත්වරුනි,

අද අපේ මේ බස්සා සහෝදරයා, අපේ බලවත් ඉල්ලීම පිට (නෑ නෑ එහෙම කිවුවම කැතයි යකෝ - පසුබිමින් ඇසෙයි-) අපිට මෙතනට ආරාධනා කරලා සංග්‍රහ කලාට මාගේ ස්තූතිය මෙයින් ප්‍රකාශ කර සිටිනවා. (පසුබිමින් : උඹ බීලා, යමං කාමරේට.)

මේ බස්සා සහෝදරයා මෙහෙම හිටියට අපේ කුදුමහත් කර්තව්‍යන්ට පුදුමාකාර විදියට උපකාර කරපු කෙනෙක්. මේ ළඟකදි අපේ චිත්‍රපටියක් කැමරා කරන්න ඇවිත් අපිට ඔහුගේ කවුරුත් නොදුටු හැකියාවක් පෙන්නුවා.

ඒ තමයි චිත්‍රපටියේ නළුවන් වුන අපිටත් හොරෙන් මූ ප්‍රධාන නිළියවම පැහැර ගැනීම. (හූ හඬ ඇසෙයි.)

අපි මේ හැකියාවට ගරු කරනව මදි. අධ්‍යක්ෂකතුමෝ, මීට පස්සෙ මූව චිත්‍රපටි වලට සම්බන්ද කර ගනිද්දි අපි මීට වඩා ප්‍රවේසම් වෙන්න ඕනෙ. (සිනා හඬ ඇසෙන විට කතාව අපැහැදිලි වෙයි.)

මේ වගේ සුලු සුලු චෝදනා තිවුනත්...................

කතාවේ ඉතිරි ටික බස්සිට අහගන්න බැරි වුනේ එකපාරටම කෝල් එක කට් වුන නිසයි.

"ඊයෙ පාටි දැම්මද?" බස්සි පහුවදා බස්සගෙන් ඇහුවා.

"හ්ම්ම්..." බස්සා සුපුරුදු පිළිතුර දුන්නා.

"කවුද අර ස්තූති කතාව කලේ.?" බස්සි ඇහුවා.

බස්සා පුදුමවෙලා වගේ බස්සිගෙ මූණ දිහා බැලුවා. බස්සි සේරම හොරෙන් අහන් ඉඳපු බව බස්සට තේරුනේ ඒ වෙලාවෙයි.

"පොඩ්ඩා...." බස්සා හිනාවෙවී කිවුවා.