හෙල්මට් ඇන්ඩ් යට ඇඳුම්

යාලුවො කට්ටියට මතක ඇතින බස්සි-ඩැඩාගෙ ඔපීසියෙ හිටපු සපරේ අංකල් ගැන කියාපු කතාව. ඔය වාගෙ අපූරු ටිකක් එක විදියක අංකල්ලා කීප දෙනෙක්ම හිටියා අපේ ඩැඩාගෙ ඔපීසියෙ. අද කියන්න යන්නෙත් එහෙම අංකල් කෙනෙක් ගැන කතන්දරයක්ලු.

මේ අංකල් නිකම්ම නිකම් අංකල් කෙනෙක් නෙමෙයි, පී.ඇච්.ඩී. එකක් ගහපු ඩොට්ටර් අංකල් කෙනෙක්. ඔය බොහොමයක් විද්‍යාඥයින්ට වගේ මේ අංකල්ටත් තදින්ම තිබුනා ඔය අමතක වීමේ ලෙඩේ.

අපි සතියෙ දවස්වලට ඉන්නෙ ඔපීසියෙ ක්වාර්ටර්ස්වල (ඒ කාලෙ.) ඉතින් ඔය සුන්දර චරිත ඇසුරු කරන්න ලැබෙන අවස්ථාව වැඩියි.

ඔන්න දවසක් අපි නංගිව ටියුෂන් ක්ලාස් එකෙන් ගන්න වෙන්නප්පු යනවා. ඔපීසියෙ මේන් ගේට්ටුව ගාවදි අර අංකල් බයික් එකේ එන ගමන් අපිට සැලියුට් පාරකුත් දාගෙන යනවා.

අපි ඉතින් නංගියාවත් ක්ලාස් එකෙන් අරගෙන එහෙමම කටුනායක යන්න පිටත් වෙනවා. තෝප්පුව හන්දිය හරියෙ මාර වාහන තදබදයක්. ඔය අතරෙ අපි දකිනවා අර අංකල්ගෙ ඔෆිස් කැබ් එක.

බස්සි-ඩැඩාත් වාහන අතරෙන් කැබ් එකට ළං වෙන්නෙ හෝන් පාරක් දාලා ටටා බායි කියන්න. බලද්දි මෙන්න යකෝ බයික්වල යන මිනිස්සු එහෙම ඒ කැබ් එක ගාව ස්ලෝ වුනාම මාර උනන්දුවෙන් ඇතුලට එබීගෙන යනවා. කැබ් එක පාස් වෙද්දිම දැවෙන කුතුහලයෙන් යුතුව අපිත් ඇතුලට එබුනා.

මෙන්න බොලව් අජටාකාශගාමියෙක් ස්පේස් කිට් එක පිටින් කැබ් එක එලෝනවා.

අපිට එන්න පුලුවන් ආසන්නම නිගමනය වුනේ අංකල් උදේ බයික් එකේ එනකොට ඇඳන් ආපු ජැකට් එකයි, හෙල්මට් එකයි පිටින්ම ගිනි මද්දහනේ කැබ් එකෙන් ගමනට පිටත් වෙන්න ඇති කියන එකයි.

***********************************


 

තාත්තලාගෙ ඔපීසියෙ ක්වාර්ටර්ස් වල සහ අවට ඉන්න සේවකයන්ගෙ දරුවන්ට තියෙනවා වෙනමම ස්කූල් ට්‍රාන්ස්පෝර්ට් එකක්. අපේ ක්වාර්ටර්ස් එක තියෙන්නෙ ආයතනයේ වාහන නැවතුම්පොළට කිට්ටුවෙන්. ඒ නිසා බස් එක ගේ ගාවට එන්න කලින් අපි යනවා බස් එක ගාවට.

ඔන්න එදාත් අපි උදේ බස් එක නැවතුම්පොලෙන් එලියට ගන්නකම් සෙකියුරිටි ඔෆිස් එක ළඟට වෙලා කයිවාරුවක් කියවකියවා ඉන්නවා. ඔතනට තමයි රියැදුරු අංකල්ලා සේරම එක්කාසු වෙන්නෙත්. උදේට එතන සෑහෙන පිරිසක් එක්කාසු වෙනවා තම තමන්ගෙ ගමන් බිමන් වලට.

ඔන්න ටික වෙලාවකින් අපිට පේනවා අර අංකල් සූට් බූට් ගහලා රිය නැවතුම්පොලට ඇදෙනවා. ටයි පොල්ලත් අතේ ගුලි කරගෙන එන්නෙ.

“මම මේ වාහනේ පරක්කු මොකද බලන්න ආවා පයින්ම. නමය වෙද්දි නුගේගොඩ යන්න ඕනෙ කන්ෆරන්ස් එකට.” අංකල් රියැදුරාගෙ පමාවට හේතු විමසමින් එහෙම කිවුවා.

ඔන්න ටිකකින් ඩ්‍රයිවර් අංකල් හති හලාගෙන සයිකල් කට්ට පැදගෙන එනවා. ඒ දැකපු අංකල් මෙච්චර වෙලා අතේ ගුලි කරන් හිටපු ටයි එක පළඳින්න සූදානම් වුනා.

අහෝ ඛේදයකි. ඉරකි. තිතකි. අංකල් ටයි එක කියලා මහා ජන ගඟක් මැද දිග ඇරියේ අන්ඩර්වෙයාර් එකකි.

කම්මුල් නම් රතු වුනාද කියන්න දන්නෙ නෑ, පොර මූණ පුරා රැවුල වවාගෙන ඉන්නෙ.

කතාවේ දෙවනි අර්ධය මට ඇහුනෙ අහම්බෙන්. අනුමානයක් නෑ ඒකනම් ඩ්‍රයිවර් අංකල්ලා මොඩිෆයි කොරාපු වර්ශන් එකක්.

බස්සි-ඩඩාගෙ ඔපිස් වාහනේ ඩ්‍රයිවර් අංකල් බස්සි ඩඩාට ඔය කතාව කියනවා. බස්සි පස්සෙ සීට් එකේ ඉඳන් කන දාගෙන ඉන්නවා.

ඔන්න අර අංකල් වෙච්ච ලැජ්ජාව අන්ඩර්වෙයාර් එකත් එක්කම අතේ ගුලි කරගෙන ක්වාර්ටර්ස් එක බලා පල්ලම් බැස්සලු.

කාමරේට ගිහින් හොයනවා හොයනවා හොයනවා ටයි එක නෑ. අංකල්ට දැන් මාර අස්පට්. වැදගත් විදියට යද්දි ගැලපෙන ටයි එකක් එපායැ දාන්න.

ඒත් ඉතින් පරක්කු වෙන නිසා ඔහෙ කමක් නෑ මෙන්න මේ අන්ඩර්වෙයාර් එකවත් ඇඳන් යනවා කියල ඒක ඇඳගන්න ලෑස්ති වුනාලු.

බලද්දි මෙන්න යකෝ **** ඉන්නවා

ටයි දාගෙන!!!!!!!!