රතු දුඹුරු හිතදැඩි බසය

රතු දුඹුරු කලබල බසය

යාන්තම් උඩ පැන පැන

ගොරව ගොරවා ගාටන

'ස්‍රාස්' හඬකින් පෙරට විසිවී නවතින

ගිලගත්තු සිරුරක් දෙකක් වමාරන

ජනෙල් වීදුරු හෙමින් දිගටම වෙවුලන

කාස ඇංජිම මගදිගට කැහැ කැහැ යන

ඉතා කම්මැලි හෝන් හඬකින්

නිදිකිරන ඇස් ඇහැරන

මග බලන මල් මුහුණු පෙලකට

මහත සැර දුම් ගුලි පිඹින

රතු දුඹුරු කලබල බසය

කැස්සකුත් එක්ක හුස්මක් ඇද

'අනේ මට ඇති ලෙඩක් නෑ' කියන

බෙහෙත් පෙති කොට්ටෙ යට හංගන

හිස බමනකොට නතර කර මග කෙලවර

උස කෙට්ටු මිටි මහත 

සිරුරු සේරම පාර මැදටම අත හරින

පැනඩෝල් පෙති දෙකක් විගහට ගිලින

'හාං දැං හරි යං!' කියාගෙන

ආයෙමත් ගාටන ගමන අරඹන.