හසරැලි මැදින් නව වසරක් උදාවේ........!!!

ඔන්න ඉතින් දෙදාස් දහතුන අවුරුද්ද ගෙවිල ගෙවිල නැට්ටටම ගෙවිලා ඉවර වෙලා යන්නයි හදන්නෙ. ඒත් දුක් වෙන්ඩ එපා දෙදාස් දාහතර අවුරුද්ද එල්ලිලා ඉන්නවා දෙදාස් දහතුනේ නැට්ටෙ. අපි ඔයාකාර රතිඤ්ඤා පුපුරෝලා, අහස් කූරු උඩ ඇරලා, නිලා කරකෝලා සුභපතන්නෙ 2013 ගෙවිලා යන නිසාද, 2014 පටන් ගන්න නිසා ද කියන එක හරිම ප්‍රහේලිකාවක් බස්සිට නම්.

කොහොමින් කොහොම වෙතත් දෙදාස් දහතුන මගෙ ජීවිතේ එක පරිඡ්චේදයක අවසානයත්, අලුත් පරිඡ්චේදයක ආරම්භයත් සනිටුහන් කොරාපු අවුරුද්දක්. ඇයි හත්තිලව්වේ බස්සි බ්ලොග් ලෝකෙට පය ගැහැවුවෙත් දෙදාස් දහතුන අවුරුද්දෙ නෙව. ඉතිං මේ ගෙවිල යන අවුරුද්ද මටනම් අමතක නොවෙන මතක ගොන්නක් තෑගි කරල තමයි මේ ටටා කියල යන්ට තනන්නෙ.

 

දෙදාස් දාහතර අපේ ජීවිත පොතට එකතු කරනවා මොනවත්ම නොලියාපු, නැවුම් සුවඳ හමන, කිරිසුදු පාට පිටු තුන්සිය හැට පහක්ම. නැවුම් සුවඳ හිතට සහනයක් ගේනවා තමයි. ඒත්, දවස ගෙවිලා, පිටුව අවපැහැ ගැන්වෙන්න කලියෙන්, ඔයා ගාව තියෙන ලස්සනම පාට වලින්, ඔයා ආස කරන විදියට ඒ පිටුව පාට කරන්න. ලැජ්ජාවක්, බයක් නැතුව මුලු ලෝකෙටම වුනත් පෙන්නන්න පුලුවන් විදියෙ පාට තෝරගන්න. පරිස්සමට, සීරුවට ලස්සන පාට කිහිපයක් කලවම් කරන්න. එකම එක පාටකින් විතරක් මුලු කොලේම පුරවන්න ගියොතින් ඔයාගෙ සිත්තම ඔයාටම එපා වේවි.

 

පාට හිඟ කෙනෙක් හිටියොත් ඔයාගෙ පාට එයාටත් දෙන්න. හුවමාරුවකට කැමැත්තෙන් ඉන්න උදවියත් එක්ක පාට හුවමාරු කරගන්න. හැමෝගෙම සුදු පිටුවල පාට සිත්තම් ඇඳෙන හැටි බලලා සැනසිල්ලෙන් හිනාවෙන්න.

 

පාට හිඟ නැතුව තිවුනත්, සිත්තමක් සම්පූර්ණ කරගන්න බැරි කෙනෙක් මුණගැහුනොත් දෙපාරක් හිතන්නෙ නැතුව එයාට උදව් කරන්න. එයා ඔයාට තීන්ත බිංදුවක් වත් නොදෙනවා වෙන්න පුලුවනි, වචනෙකින්වත් ස්තූතියක් නොකරනවා වෙන්න පුලුවනි. ඒත් ඔයාගෙ උදවුවෙන් හැඩ ගැන්වෙන එයාගෙ සිතුවමේ කාන්තිය ඔයාගෙ ජීවිතේ එලිය කරාවි.

 

කවි පද ටිකකුත් ලිවුවා ඕන් 2014 අවුරුද්දට ආසිරි පතලා.

 

සැණකෙලි සිරින් ලොව පිබිදෙන වෙලාවේ
ගිණිකෙලි නදින් අහසම සැරසුනාවේ
සිතිවිලි රුවින් විකසිත හද තලාවේ
හසරැලි මැදින් නව වසරක් උදාවේ

 

පෙට්‍රල් මිල වගේ සොම්නස වැඩි වෙන්නයි
මොඩ්ලර්ලගෙ ඇඳුම් මෙන් දුක අඩු වෙන්නයි
මෙන්ටල් අවුල් සේරම දුරු වී යන්නයි
පිස්ටල්, කඩු, කිණිසි සෙල්ලම් නොදකින්නයි

 

තියන තියන හැම පියවර සුභ වේවා
කරන කියන දේ රිසි ඵල ගෙන දේවා
හිතන පතන සැප සම්පත් ඉතිරේවා
නිතින සහන ලැබදෙන වසරක් වේවා

බස්සිගේ නවාතැනට ගොඩවදින කුරුලු යාලුවො හැමෝටම වාසනාවන්ත නව වසරක් වේවා....!!!