නිමාවක් නැති හීන ඉපදුනේ මෙතැනය.

ඇහැළ ඇතිරිය නොපෑගෙන්නට

හෙමිහෙමින් අඩි තියා එනකොට

කතා අඩු සීනියර් කොල්ලා

බලා උන්නේ මෙතැනය

උදේ ලෙක්චර් දෙකක් කට් කර

තියාගෙන බර අතක් උර මත

දකුණු කන් පෙත්තට හුස්ම පිඹ

ආදරෙයි මිමිණුවේ මෙතැනය

තල් වැටේ හෙවනට මුවාවී

තව් මැරූ ලොකු කෙසෙල්කොලයක

එතූ බත්මුල ලිහා හෙමිහිට

අනා කැව්වේ මෙතැනය

පුස්තකාලේ හුස්ම ගන්නට

නීරසයි කම්මැලියි හිතුනම

උකුළ මත හිස තබා ඇලවී

කුප්පි දැම්මේ මෙතැනය

මහා ලොකු රණ්ඩුවක් අවසන

ක්‍රිකට් මැච් එක අතරමගදී

කඳුලු වල ලුණු රහක් තැවරුන

දෙතොල් සිම්බේ මෙතැනය

ස්ටේජ් ඩ්‍රාමා නිමාවී

පඩි පෙලේ කෙලවරක ඉඳගෙන

කතා සාරය, රස අරුත් ගැන

විචාරන්නේ මෙතැනය

හීන ගොඩකට පාර කිව්වේ

මෙතැනය

මතක මල් ගොමු සුවඳ දෙන්නෙත්

මෙතැනය

ඒ වුනත් හදවත පිපෙන්නේ

තාම කෙලවර නොදුටු

දීර්ඝම ස්වප්නයකට

උඹ ගේන

උණුහුමට ය.

~~~~~~~~