බස්සිගෙන් වැලන්ටයින් අයිටම්

වැලන්ටයින් දිනේ ළඟ ළඟ එන හින්ද බස්සි හිතුවා තමන්ටම නිර්මාණය  කරගන්න පුලුවන් වැලන්ටයින් තෑගි කිහිපයක් ගැන සුට්ටි උපදෙස් මාලාවක් දෙන්න. ඔවුවා ඉතින් මම කටු කාගෙන හදලා එක්කෙනෙක්ට පරිත්‍යාග කොරාපු තෑගි තමයි. ඒ නිසා අත්දුටුවයි, ප්‍රත්‍යක්ෂයි, මේ තෑගි වලින් ලබන්නාවූ  නවම් පොහෝ  දින ඔබ දෙපළගේම සිත් පහන් වේවි.



සරලයි, ඒත් පිළියෙල කරන්න සැලකිය යුතු තරමේ කාලයක් නම් වැයවේවි.

ඔන්න එහෙනම් රම්බර නම්බර වන්

LOVE PILLS

මේවා happiness pills කියලත් හඳුන්වනවා. බස්සිට මේ ගිෆ්ට් අයිඩියා එක ලැබුනෙ "The Millionaire’s First Love" කියන ෆිල්ම් එකෙන්. පියවරෙන් පියවර කියන්නද එහෙනම්?

මුලින්ම මේ උවමනා දේවල් ලැයිස්තුව හොයාගෙන ඉන්න ඕනෙ.

1. පාට A4 කොල 10ක් 15ක් විතර

2. කොට්න් බඩ් බොක්ස් එකක් හෝ ජුවෙලරි බොක්ස් එකක්

3. කොට්න් බඩ් බොක්ස් එක/ජුවෙලරි බොක්ස් එක දාන්න කාඩ්බෝඩ් පෙට්ටියක්

4. මේ කාඩ්බෝඩ් පෙට්ටියෙ සරසන්න උවමනා විසිතුරු කොළ වර්ග

5. කතුරු, ගම්, සෙලෝටේප් වගේ ආම්පන්න.





A4 කොල 1.5 cm – 10 cm තරමේ කෑලි වලට කපා ගන්න. මේ වගේ කෑලි 365ක්ම කපා ගන්න පුලුවනි නම් වඩාත් හොඳයි.



ඒ තුන්ඩු කෑලි වල පුංචි පුංචි ආදර වදන් ලියන්න. එකම දේ තුන්ඩු දෙකක ලියන්න එපා. හැම තුන්ඩුවකම අලුත් පණිවුඩයක් ලියනවානම් වඩාත් හොඳයි.

උදා :  

What is tigger without Pooh
What is Bella without Edward

What is Ginny without Harry
That is me without YOU

දැන් මේ තුන්ඩු කෑලි එකින් එක හීනියට රෝල් කර ගන්න.


තුන්ඩු කැලි 365ක් අහුරන්න පුලුවන් පෙට්ටියක් සෙවීම තමයි ඊළඟ රාජකාරිය. බස්සිනම් මේ සඳහා යෝජනා කරන්නෙ 'කොට්න් බඩ් බොක්ස්' එකක්. (මේ කියන්නෙ අර කන් සුද්ද කරන කොට්න් බඩ් අහුරාපු ඒවා නෙමෙයි යාලුවනේ. තෑගි සාප්පුවල තියෙන ගිෆ්ට් අයිටම් එකක්.)  විනිවිද පේන පුංචි වීදුරු බොක්ස් එකක්.



මේ අයිටම් එක හොයාගන්න නැත්නම් ඊළඟට සුදුසුම විසඳුම ජුවෙලරි බොක්ස් එකක් තමයි. අර හදවත් හැඩේ ආභරණ පෙට්ටි දන්නවා නේද?

දැන් අර රෝල් කරාපු තුන්ඩු කෑලි ටික එක ගානකට ජුවෙලරි බොක්ස් එකේ/ කොට්න් බඩ් බොක්ස් එකේ අහුරන්න. පාට පාට තුන්ඩු එකිනෙක මුහු වෙන විදියටයි අහුරන්න ඕනෙ. ඉවසීමෙන් කලොත් අහුරලා අහවර උනාම මේක පේන්නෙ රෝස මල් පෙට්ටියක් වගේ.



දැන් මේ තෑග්ග අහුරන්න කාඩ්බෝඩ් පෙට්ටියකුත් ලස්සනට සකසා ගන්න ඕනෙ. ජුවෙලරි බොක්ස් එකේ/ කොට්න් බඩ් බොක්ස් එකේ කාඩ්බෝඩ් ඇසුරුම මේකට යොදාගන්න පුලුවනි.

කාඩ්බෝඩ් පෙට්ටිය වටේට පාට කඩදාසිය අලවන්න. මේක අලවන්න ඕනෙ පෙට්ටිය අරින්න වහන්න පහසු වෙන විදියට. (එහෙම නැතුව තෑග්ගක් ඔතන විදිහට නෙමෙයි.) ඒකෙ උඩින් 'Love Pills' නැත්නම් 'Happiness Pills' කියල ලියන්න. පහලින් භාවිතයට උපදෙස් කියලා පුංචි ආදරණීය උපදෙසක් දෙන්න.

උදා :  

Directions to use :
Dosage – take one pill each morning.

Warning:
Over dosage may bring tears of happiness.

මේ තෑග්ග උපන්දින තෑග්ගක් විදියටත් නරකම නෑ.

තවදුරටත් මේ අදහස අපැහැදිලි කුරුලු යාලුවො වෙනුවෙනුයි මේ වචන ටික කොටන්නෙ. තුන්ඩු කෑලි 365 හරියට හදවතට දෙන බෙහෙත් පෙති 365ක් වාගෙ. දවසට එක ගනනේ කියවන්නයි දෙන්නෙ. ඊළඟ අවුරුද්ද වෙනකම් ඒ බෙහෙත් පෙති 365 එයාව සතුටෙන් තියයි.

රම්බර නම්බර ටූ

Sweet Box

මේක චුවිංගම්, චොකලට් සහ වෙනත් පුංචියට හදාපු රසකැවිලි කන්න ආසා කරන කුරුල්ලෙක්ට/ කිරිල්ලියෙක්ට තෑගි දෙන්න සුදුසුයි.

මුලින්ම තරමක් ඉඩකඩ තියෙන ප්ලාස්ටික් බෝතලයක් හොයාගන්න. දැන් කඩවල්වල තියෙනවනෙ තුනපහ අහුරන්න හදාපු එක එක හැඩේ හුරුබුහුටි ප්ලාස්ටික්/වීදුරු බෝතල්. ඒවා මේ වැඩේට අපූරුයි.

බෝතලේ 3/4 ක් විතර පිරෙන තරමට අර කලින් කියාපු රසකැවිලි වර්ගය මිලදී ගන්න. කුරුල්ලා/කිරිල්ලි පැණිරස ජාති වලට ගොඩාක් මනාප කෙනෙක් නම් එයා කැමති රසකැවිලි වර්ග කීපයක් එකට කලවම් කරලා පාවිච්චි කරන්නත් පුලුවනි.

දැන් තියෙන්නෙ වැලන්ටයින් ඩේ එකට ගැලපෙන ඇඩ් එකක් එකතු කිරීම. බෝතලයේ ඉතිරි ඉඩ පිරෙන්න පාට කඩදාසි වලින් ඔරිගාමි හදවත් නිර්මාණය කරගන්න. (ඔරිගාමි හදවත් නිර්මාණය කරගන්නා හැටි මෙතනින් බලාගන්න පුලුවන්.)

ඔරිගාමි හදවත් නිර්මාණය කරගන්නා ආකාරයට රූපමය මගපෙන්වීමක්.

අඟල් 4X4 ප්‍රමාණයේ කඩදාසි කොටුවකින් තමයි ඔරිගාමි හදවත් නිර්මාණය කිරීම ආරම්භ කරන්නෙ. ඉතින් මේ කඩදාසිය ඇතුල් පැත්තෙ ලස්සන සුභපැතුමක් ලියන්න.

ඔරිගාමි හදවත් සියල්ලේම එකිනෙකට වෙනස් සුභපැතුමක් ගනනේ ලියන්න පුලුවන්නම් අපූරුයි.


දැන් අර ප්ලාස්ටික්/වීදුරු බෝතලේට රසකැවිලි ටිකයි, ඔරිගාමි හදවත් ටිකයි දාලා මිශ්‍ර කරන්න. මේකට කඩදාසි රෝසමල් එහෙමත් දාලා තවත් ලස්සන කරගන්න පුලුවනි.

මෙන්න රම්බර නම්බර ත්‍රී

1000 Reasons Why I Love U!

 

මේ තෑග්ග පිළියෙල කරන්න යන වියදමත් අවමයි. උවමනා කරන අඩුමකුඩුම වුනත් අමුතුවෙන් සඳහන් කරන්න තරම් දෙයක් නෑ. කාලය තරමක් වැයවේවි. ඒත් වටිනාකම නම් මිල කරන්න බැහැ.

මිළදී ගන්න අවශ්‍ය එකම දේ ලස්සන සටහන් පොතක්. මේක ඔයාගෙ බජට් එකේ හැටියට තෝරාගන්න පුලුවනි. පර්ස් එක බරට දැනෙනවානම්, ලොක් කරන්න පුලුවන් විදියෙ පුංචි ඉබි යතුරක් එක්ක එන සමරු පොතක් වගේ ගන්න පුලුවනි. නැතිනම් ලිපිද්‍රව්‍ය සාප්පුවකින් ගන්න පොත් පිංචක් වුනත් වැඩේට හොඳටම සෑහෙනවා.

ඒ සටහන් පොතේ ඔයා කුරුල්ලාට/කිරිල්ලිට ආදරේ කරන්න හේතු දහසක් (සියයක් වුනත් සෑහෙනවා.) ලැයිස්තුගත කරන්න. ලස්සනට ලියන්න. හිතට දැනෙන දේ, ඒ විදියටම ලියන්න.

මෙන්න මේ වගේ.....

ඔයා හොඳ සවන් දෙන්නෙක්.
මම කියවන වල්පල් සේරම ඔයා කිසි
අපහසුවක් නැතුව අහගෙන ඉන්නවානෙ.


ඔයාට පුලුවනි මගේ ඕනෑම
නරක මූඩ් එකක් අතුරුදහන් කරවන්න.

දැන් ඒ පොතේ ලස්සන රෝසමලක් දෙකක්, හදවතක රූපයක්, වේලාගත්තු මල්පෙති ආදිය අලවලා හැඩ කරන්න.
 

බස්සා ගාවනෙ මං හදාපුව ටික. ඉතින් ෆොටෝ කෑලි දාන්න විදියක් නෑ. හෙට බස්සා ආවම තවත් පැහැදිලි වෙන්න ෆොටෝ කෑලි ටිකක් අමුණන්නම්කෝ.  ඔන්න තව දවස් දහයයි. වැඩ පට්ටාන් ගන්න තමයි තියෙන්නෙ දැන්.