ඔබ නොදන්නවා වගේ ඉන්නවා

 
“ඔබ මට ආදරෙයි නොකියා – නොදන්නවා වගේ ඉන්නවා…”

Crush එහෙකට කියන සිංහල වචනෙ මොකද්ද හැබෑට? මටනම් ඒ ගැන කිසිදු අදහසක් නෑ. ඒත් නිකමට වාගෙ ඉන්ගිරිස් - සිංහල ඩික්ෂනරියක ඔය වචනෙ ටයිප් කොරල බලන්නකො.
 

මට හිතෙන්නෙ ඒ Crush එක තමන් ගැන හාංකවිසියක් දන්නෙත් නෑ, තමන්ව තුට්ටුවකටවත් මායිම් කරන්නෙත් නෑ කියල තේරුම් ගත්තාම ඇතිවෙන හැඟීම මොකද්ද කියන එක නම් ඔය සිංහල තේරුමෙන් අගේට පැහැදිලි වෙනවා.
 

හැබැයි ඔය අප්‍රකාශිත ආදරයට කරන්න පුලුවන් දේවල් බොහොමයි. තැලිච්ච, පොඩිවෙච්ච හදවතකින් එලියට ගලන වේදනාව කලවම් වුනු, කඳුලින් ඔප වැටුනු නිර්මාණ වල රහ වැඩියි මට හිතෙන විදියට.

 

බස්සිත් කාලෙකට කලින්, සූටි බසු පැටවෙක් සන්දියේ ඔන්න ඔය විදියෙ Crush එකක් වෙනුවෙන් ලියාපු  කවියක් බ්ලොග් කටුවෙත් පල කලා. යාලුවො සමහරු බය වෙලාත් තිවුනා එවුවා අපේ බස්සාට ලියාපුවදෝ කියල හිතල.

 

එහෙම හිතපු කුරුලු යාලුවො අපූරු කවි comment සංවාදයක් ගෙනිච්චා. නොදන්න අයට මෙතනින් ගිහින් ඒ කවි සංවාදය බලන්න පුලුවනි.
 

ඔන්න ඉතින් අද පල කරන්නේ ඒ අවුරුදු ගාණක් පැරණි Crush එක වෙනුවෙන් ලියාපු පුරාණ පදවැලක්.

පිණි කඳුලු මල් පෙති සිඹින්නේ සඳ අඳුරු වුන දා
වැහි කඳුලු පොලවට වැටෙයි ගගනත රුදුරු වුන දා
මගෙ කඳුලු දෙකොපුල් තෙමාලන්නේ කිමද මන්දා
මම තනියෙන්ම දුක් වින්දා
 

මා දිහා අමනාප නෙත් රැඳවූව දවසක් නෑ
මා සවන් මත රුදු වදන් රැඳවූව දවසක් නෑ
ඒ කිමද අද වනතුරා ඔබ නෙත් විවර කර නෑ
මා හඳුනගෙන නෑ

නෙත් කෙවෙනි රත් පැහැ වුනේ කිම හිතා ගන්නත් 9බෑ
දුක රැඳුන මතකයක් නෑ දුක දරාගන්නත් බෑ
කඳුලු වියැලෙන තුරා මට මග බලා ඉන්නත් බෑ
හිත හදා ගන්නත් බෑ

(පදමාලාවෙ ගුණ  අගුණ  කියලා යනවනම් මං හරි ආසයි.)