කෝපි හදවතක්

අංශුවක් අංශුවක් පාසා

සිනා සරදම් බුබුලනය වෙන

පැහි පැහි නටන වතුරකට

ඝන වු සුවඳම මුසු කරන

උණු කෝපි මේ තරම්

මිහිරිද?

නට නටා සියොළඟ පුළුස්සන

දයා විරහිතවම යලි පැහෙන

නීරසවු උණු වතුරකට

අමුතු රසයක් කලතවන

කෝපි ඔබ මේ තරම්

ආදරේ දන්නෙ කොහොමද?

වියළි තොල්පෙති පොපියවන

ගෙල දිගේ මිදුන අලස සීතල

දුම් දදා එලියටම එලවන

උණුවතුර බෝතලේ එක්කම

රැය පහන් වෙනකම් තනිරකින

කෝපි,
මට ඔය තරම් උණුහුම්

හදවතක් හොයාදෙන්න පුලුවන්ද?

~~~~~~